كَثرو المساكن في هاد الغابة
نعجة مَحتارة بين جوج ديابة
الشوفَة إنسان و الأصل تراب
القلب جيعان
و الخاطر مَضرور
الريق في الحَلق ويدان
و الكلام في جوفي
حطب يابس عطشان
من حَرو بكات النيران
و تحَبسات الشتا في سحابة كذابة
مسكين جَوال
يومي دراهمو معدودة
و الجيب مَعلول
يشكي الحال من حَر الطوفان
حاني راسو وسط الجيوب حَشمان
لا خال يحن يداوي
و لا عَم علينا يرووف باللي كان
وَحداني و الدار عامرة
و دروبة بلادي ناس دايرة
كلاو فين رماتو الدنيا طمعاتو
شي بالمال فَتناتو
شي بالزين هبلتو
شي داق حلاوة أيامها
و قال في نفسو هادي لي
العيشة هانية
و لجمرها في رمشة العين
رماتو و كواتو
الذات مَهدودة
و اليد مَحفورة بالشدة موشومة
الدمعة صارت في وجهنا صورة مرسومة
و العيشة في ايامنا لقمة مقسومة
رضينا باللي كان
و اللي كان ما رضى بينا
مشينا جنب الحيط
ناض الحيط راب علينا
سدينا علينا الباب
ما لقينا سقف يغطينا
أودي كن كان عندنا غير جَنحين
كن فيما ضاقت بنا طَرنا
و إلا عيينا و تهدينا
بنينا عش من قش
و من هم الدنيا اتهنينا
ياك أخرها قبر و ثوب يسترنا
و سمية باهتة و بعض حنوط
شمعة باكية بدموع سايلة
على جنابها مربوطة بخيوط
الإسم عايشين و العيشة منا
محبوسة بين زوج حيوط
هكذا ذا العصر واهل الزمان .....أحسنت اسقاط الواقع ....لمن يعتبر ....والذكرى تنفع
ردحذف